Би 2019 онд Капитал банкыг татан буугдах үед тус банкны харилцагч байсан юм. Сошиал, телевизийн сувгуудаар Капитал банк татан буугдлаа гэсэн мэдээ хөврөв. Миний толгойд “Дансан дахь мөнгөө яаж буцааж авах вэ? Одоо яг яах ёстой юм болоо? Ингээд л миний мөнгө байхгүй болчих юм байхдаа ” гэсэн айдас үнэнийг хэлэхэд төрсөн. Тухайн үед надад дансан дахь мөнгө маань даатгагдсан байдаг талаар мэддэг нарийн ширийн зүйл байсангүй. Би ч чихээ тавин нүдээ бүлтийлгэн мэдээ үзэн суугаад Капитал банканд байгаа миний данс Хадгаламжийн даатгалын корпорациар даатгагдсан байдаг тухай олж сонслоо. Тэр даруйдаа энэ байгууллагын вэб, фэйсбүүк руу орж энэ талаар цааш нь лавшруулан судалсан. Хуулиараа бол 20 хүртэлх сая төгрөг даатгагдсан байдгийг мэдсэн. Банк бидний өмнөөс Хадгаламжийн даатгалын корпорацид даатгуулсан байдаг юм билээ. Тухайн үед би Капитал банканд 17 сая төгрөгийн хадгаламжтай байсан. Хадгаламж дээр маань хуримтлагдсан хүүг нь нэмээд нийтдээ 19 сая гаруй төгрөгийн нөхөн төлбөрийг Хаан банкаар дамжуулан авсан. Их баярлаж бас тайвширч билээ.Нөхөн төлбөрөө авахад санасныг бодвол явдал чирэгдэл багатай, хялбар байсан. Хамгийн сайхан нь бусад албан журмын даатгал шиг төлбөр, хураамж төлөхгүй нь их амар санагдсан. Та бүхэнд ажлын амжилт хүсье!

Миний хувьд хадгаламж бол санхүүгийн хамгийн чухал хэрэгслүүдийн нэг. Өнөөдөр манай улсад магадгүй бүх л хүн ямар нэгэн хэмжээгээр зээлтэй байдаг байх. Яг үүнтэй адил бүх хүн хадгаламжтай байгаасай гэж хүсэж байна. Тэгээд ч бидний дансанд байгаа 20 сая хүртэлх төгрөг даатгагдсан, ямар ч эрсдэлгүй байдаг болохоор яах аргагүй санхүүгийн хувьд бидэнд их ач холбогдолтой гэж боддог.

"Хүн ер нь ирээдүйд юу ч тохиолдож болдог учраас бэлэн байх ёстой гэж боддог. Энэ утгаараа орлогынхоо тодорхой хэсгийг байнга банканд хадгалуулдаг. Дээр нь банкан дахь хадгаламж даатгагдсан байдаг бөгөөд даатгалд хамрагдахын тулд би ямар ч төлбөр хураамж төлөхгүй нь их амар санагдсан. Магадгүй энэ нь олон хүмүүсийн мөнгөө банканд хадгалуулахын гол хөшүүрэг, шалтгаан нь болдог байх"